।।श्रीगणेशाय नमः।।
श्रीमत्कल्याणवर्मसूरिविरचिता
सारावली

त्रयस्त्रिंशोऽध्याय:

लग्नाद्दशमे राशौ कर्मफलं यत्प्रकीर्तितं मुनिभि:।

राशिग्रहस्वभा(भागै)वैर्ग्रहदृष्ट्या तदहमपि वक्ष्ये।।1।।

होरेन्‍द्वोर्बलयोगाद्यो दशमस्तत्वस्वभावजं कर्म।

तस्याधिपपरिवृद्ध्या वृद्धिर्ज्ञेयाऽन्यथा हानि:।।2।।

जाङ्गलमथवानूपं तथोभयं वा गृहं परोक्षेत।

ग्राम्यमथारण्यं वा सौम्यर्क्षं पापभवनं वा।।3।।

द्विपचतुष्टरूपं सरीसृपं वा तथोभयं चैव।

यद्रूपं तद्भवनं यादृशकं (तत्स्वभावं)यत्स्वभावं च।।4।।

प्रवदेत्तत्समदेशे कर्मप्राप्तिं नरस्य तत्सदृशीम्।

तस्माद्दशमं भवनं प्रसवे बुध्येत यत्नेन।।5।।

दशमे नक्षत्रपतेर्लग्नात्पुरुषस्य (यस्य)कर्म संभवति।

सर्वारम्भे वृत्तिं(सिद्धिं) विनिर्दिशेत्तस्य जातस्य।।6।।

द्व्यन्तरयोगाध्याये कथितं कर्मस्थितैर्ग्रहर्लग्नात्।

चन्द्रादत्र विशेषो ग्रहै: स्थितैर्व्यक्तमिह वक्ष्ये।।7।।

चन्द्राद्दशमे सूर्य: सिद्धारम्भं धनै: समृद्धं च।

जनयत्युत्तमसत्त्वं नृपतिमुदग्रं (धनाश्रयं)जनाश्रयं पुष्टम्।।8।।

भौम: साहसनिरतं प्रत्यन्तनिवासिनं(सितं) विषयलुब्धम्।

क्रूरं निषादचरितं जनयति दशमे स्थित: पुरुषम्।।9।।

विद्वांसं धनवन्तं बहुश्रुतं (नृपतिसंमतं)नृपतिनायकं ख्यातम्।

जनयति सौम्यो दशमे पुरुषं बहुशिल्पिनं प्राज्ञम्।।10।।

गुरुरपि दशमस्थाने सिद्धार्थं धार्मिकं धनसमृद्धम्।

जनयत्युत्तमचरितं नरेन्द्रसचिवं नरं ख्यातम्।।11।।

शशिनो दशमे शुक्र: सुभगं ललितं च वित्तवन्तं च।

जनयति सिद्धारम्भं धनिनं नृपपूजितं पुरुषम्।।12।।

सौरो व्याधितदेहं  नि:स्वं दु:खान्वितं प्रजाहीनम्।

कर्मसु नित्योद्विग्नं जनयति दशमे स्थित: पुरुषम्।।13।।

भानुर्भौमसमेत: कर्मकरान्का(कामशोमदबहुलान्)सशोषगदबहुलान्।

ज्योतिर्विद: प्रकुर्याल्लाक्षणिकांस्तार्किकांश्चापि।।14।।

सूर्य: सौम्यसमेतो वस्त्रालङ्कारभागिनं वणिजन्।

जनयति मेषूरणग: पुरुषं जलजीविनं वाऽपि।।15।।

जीवसहाय: सूर्य: सिद्धारम्भान्नरेन्द्रमान्यांश्च।

जनयति दशमे पुरुषान् (वीरान्)धीरान्शूरान्सुविख्यातान्।।16।।

सूर्यसहाय: शुक्रो दशमे स्वजनाश्रितं नरं कुरुते।

स्त्रीसंश्रयात्समृद्धं सुभगं नृपवल्लभं चापि।।17।।

सूर्य: स्वपुत्रसहितो दशमे वधबन्धभागिनं भृतकम्।

जनयति दीनं कृपणं चौरैर्मुषितं प्रलापकरम्।।18।।

भौम: सोमजसहितो जनयति दशमे नरं (नृशंसं)बहुविपक्षम्।

अस्त्रकलावेत्तरं कौशलमति जीविनं महाशूरम्।।19।।

भौम: सुरगुरुसहितो दशमे कुरुते बलस्य नेतारम्।

मित्रेभ्यो लब्धधनं तदाश्रयाज्जीवितं धन्यम्।।20।।

जनयति विदेशनिरतं काञ्चनमुक्तादिभिर्वणिग्वृत्त्या।

भौम: शुक्रसमेतो दशमे स्त्रीसंश्रयाद्वाऽपि।।21।।

भौम: सौरसहायो जनयति दशमे स्थितो नरं प्रसवे।

साहसशीलं क्षुद्रं (कर्मोद्युवतं)कर्मायुक्तं रुजा सहितम्।।22।।

(षण्ढं)सधनं नृपेन्द्रपूज्यं धर्मिष्ठं वृन्दनायकं ख्यातम्।

जीव: सौम्यसहायो जनयति मेषूरणे पुरुषम्।।23।।

सौम्य: शुक्रसहायो जनयति दशमे सुहृज्जनोपेतम्।

विद्यास्त्रीधनसौख्यं नृपसचिवं विषयनाथं वा।।24।।

सौम्य: सौरसहायो मृद्भाण्डकरं करोति दशमस्थ:।

ख्यातं विद्याचार्यं पुस्तकलिपिलेख्यकारं च।।25।।

वचसां पति: सितयुत: कर्मणि कुरुते नरेन्द्रवरभृत्यम्।

ब्राह्मणपतिं विशोकं विद्याचार्यं समर्थं च।।26।।

सुरराजगुरु: सार्किर्दशमे नीचं (तापकरं)परोपकाररतम्।

कुरुते प्रवृद्धचेष्टं स्थिरास्पदं सुस्थिरारम्भम्।।27।।

शुक्र: सौरसहायश्चित्रक्ररं गन्धजीविनं वेद्यम्।

जनयति दशमे पुरुषं नीलकरं चूर्णकारं च।।28।।

रविभौमचन्द्रपुत्राश्चन्द्राद्दशमस्थिता नरं धन्यम्।

जनयन्त्युत्तमपुरुषं नृपतिसमं सर्वजनपूज्यम्।।29।।

रविभौमदेवपूज्या दशमस्थाने नरं सुभगम्।

शत्रूणां (जेतारं)हन्तारं जनयन्ति समृद्धिसंयुक्तम्।।30।।

चन्द्राद्दशमे भानुर्भूपुत्रो भार्गवश्च जनयन्ति।

क्रूरं साहसनिरतं (परधनहरणे)पुरधनकरणेऽतिनिपुणमतिम्।।31।।

भानुजरविभूपुत्रा दशमस्था: क्रूरकर्मनिरतं तु।

उत्पादयन्ति मनुजं मूढं पापं दुराचारम्।।32।।

रविबुधगुरवो दशमे विद्वांसं रूपसंयुक्तम्।

उत्पादयन्ति पुरुषं धर्मिष्ठं बन्धुबल्लभं चैव।।33।।

बुधसूर्यभार्गवसुता यशस्विनं धार्मिकं विगतरोषम्।

जनयन्त्यपराभूतं सौभाग्यपरिच्छदसमृद्धम्।।34।।

रविबुधशनयो दशमे क्रूरं चपलं नरं विशीलं च।

उत्पादयन्ति नियतं शस्त्राग्निपरिक्षताङ्गं च।।35।।

रविभृगुदेवपूज्या दशमस्थानोपगा नरं कुर्यु:।

सुभगं विद्याप्तधनं धर्मरतं भोगभागिनं नित्यम्।।36।।

त्रिदशगुरुमन्दसूर्या दशमे युक्ता नरं प्रकुर्वन्ति।

प्रायेण लोकमान्यं चारित्रविलोपनं धीरम्।।37।।

भार्गवविभानुसुता दशमस्थानोपगा नरं कुर्यु:।

लोभान्विमतिचपलं समस्तजनविप्रयुक्तं च।।38।।

भौमेन्दुजसुरपूज्या धर्मिष्ठं बहुकुटुम्बपरिवारम्।

जनयन्ति दशमसंस्था विद्याधनभागिनं पुरुषम्।।39।।

शोभनशिल्पाभिरतान्मालाकारान्सुवर्णकारांश्च।

कुर्युर्बुधभृगुवक्रा दशमस्था: सर्वलोकदयितांश्च।।40।।

भौमबुधसूर्यपुत्रा जनयन्ति तथा  न(सुधर्म) धर्मशीलं च।

निद्रानिरतं प्रखलं दशमस्थानोपगा नरं मलिनम्।।41।।

भार्गवसुरेज्यभौमा दशमस्थानाश्रिता नपरान्कुर्यु:।

धनसंयुक्तान्शूरान्देवद्विजपूजनानुरतान्।।42।।

विद्याधनजनहीनान्कापुरुषान्सौख्यवर्जितान्विकलान्।

जीवाङ्गारकसौरा दशमे कुर्युर्नरान्नीचान्।।43।।

सचिवानुत्तमपुरुषान्परधर्मरतांश्च(वनधर्म) धनिनश्च।

भौमभृगृसूर्यपुत्रा: कुर्वन्ति नराननेककर्मरतान्।।44।।

शुक्रबृहस्पतिसौम्या दशमे पुरुषस्य शुक्रराशिस्था:।

बहुविधमिष्टं कुर्युर्व्याधिं चाप्यन्यगृहसंस्था:।।45।।

लिपिलेख्यकाव्यनिरतं धनवन्तं बहुविधेयभृत्यं च।

अटनप्रियं सुरूपं बुधगुरुसौरा नरं दशमे।।46।।

दशमे विज्ञानयुतान्मल्लान्परदेशनिरतांश्च।

कुर्युर्बुधभृगुरविजा: कर्मोद्युक्तं सदा दान्तम्।।47।।

विद्वांसं धर्मरतं दयान्वितं सत्यवन्तं च।

भानुजगुरुभृगुपुत्रा दशमस्थानोपगा नरं कुर्यु:।।48।।

एवं त्र्यादिषु वाच्यं जन्मनि पुंसां फलं हि कर्मोत्थम्।

आदिग्रहसंयोगेऽत्र विशेषस्तमपि वक्ष्ये।।49।।

रविभौमबुधसुरेड्या दशमस्थानोपगा नरं कुर्यु:।

शूरं विक्षतगात्रं दातारं सर्वकर्मरतम्।।50।।

वक्रार्कशुक्रसौम्याश्चन्द्राद्दशमं समाश्रिता: प्रसवे।

(कुर्युर्मालाकारं लेख्यकारं चापि वास्तुकर्मरतम्)कुर्युर्निर्माल्यकराँल्लेख्यकरांश्चापि चित्रकर्मरान्।।51।।

रविकुजबुधभानुसुता दशमस्थानस्थिता: प्रसवकाले।

उत्पादयन्ति पुरुषं धनवाहनवारणोपेतम्।।52।।

रविजीवशुक्रसौम्यां जनयन्ति नभ:स्थिता नरान्सौम्यान्।

कुत्सितवृत्तीनामपि सुतान्वरान्कर्षणोपेतान्।।53।।

रविजीवसौम्यसौरा दशमस्थानस्थिता कुर्यु:।

पुरुषं मायानिपुणं क्रूरं परवञ्चनानुरतम्।।54।।

रविसितबुधभानुसुताश्चन्द्राद्दशमस्थिता नरं कठिनम्।

उत्पादयन्ति सुभगं वाग्मिनमथ कर्षणानुरतम्।।55।।

रविगुरुभार्गवशनयो मेषूरणसंस्थिता: प्रसवकाले।

उत्पादयन्ति मनुजं प्रवासशीलं विविधचेष्टम्।।56।।

भौमसितबुधसुरेड्या जन्मनि दशमर्क्षगा नरं निपुणम्।

उत्पादयन्ति चतुरं शूरं समरेष्वधृष्यं च।।57।।

भौमबुधमन्दगुरवो जन्मनि दशमस्थिता नरं मलिनम्।

जनयन्ति (सदोद्युक्तं)नरोद्युक्तं संग्रामे रिपुविनाशकरम्।।58।।

भौमबुधशुक्रसौरा नभस्थले संश्रिता: प्रसवकाले।

विद्याबहुलं शूरं जनयन्ति नरं विशालाङ्गम्।।59।।

भौमगुरुशुक्रमन्दाश्चन्द्रन्मेषूरणर्क्षगा: प्रसवे।

जनयन्ति नरं धीरं कुटुम्बयुक्त (जनोपेतम्)धनोपेतम्।।60।।

बुधुगुरुभार्गवशनयो जन्मनि दशमस्थिता: कुर्यु:।

पुरुषं शान्तमनस्कं सुमेधसं लोकदयितं च।।61।।

पापैर्नभ:स्थलस्थै: सौम्यग्रहवीक्षितै प्रजायन्ते।

वैद्यपुरोहितगणकाश्चण्डा:(चन्द्रात्) परवञ्चनानुरता:।।62।।

एते समस्तयोगा: सौम्यग्रहवीक्षिता:प्रशस्यन्ते।

पापग्रहदृष्टियुता: प्रायेण न भद्रका: प्रोक्ता:।।63।।

पापास्तृतीयषष्ठा होरेन्दुस्थानतो नृणामिष्टा:।

नेष्टा निधनान्त्यगता लग्नोपगता विशेषेण।।64।।

(हो.र.7 अ. 248 पृ.)होराशशिनोर्बलवान्यस्तस्मात्कर्मभेन वा कथयेत्।

यो बलयुक्तो (चन्द्रात्)वर्गस्तदधिपतेर्वाऽऽदिशेद्वृत्तिम्।।65।।

आरामपुत्र(बुद्धि)सेवाकृषिरसवणिगर्कदूतकार्येण।

जीवन्ति नरा नित्यं मेषगणे दशमराशिस्थे।।66।।

वृषभगणे दशमस्थे शकटचतुष्टपदविहङ्गमृगजीवी।

धान्यादिसङ्ग्रहेण च जाङ्गलदेशे फलं प्राय:।।67।।

जलवणिज:(आदि) सुसमृद्ध्या मुक्ताशङ्खप्रवालभाण्डैश्च।

लिपिगणितलेख्यजीवी नृमिथुनवर्गे दशमसंस्थे।।68।।

शस्त्राग्नियोनिपोषणमुक्तासंख्योपजीवनं(शल्यो) चैव।

(आहिण्ड)आखेटकवृत्ता वा कर्किणि वर्गे च दशमस्थे।।69।।

(संव्यूहका:)सन्नाहका मणीनां पाषाणस्वर्णरूप्यकूटांश्च(कुल्यानाम्)। 

कर्षणनिरता लेये गोजीवा धान्यवाणिजका:।।70।।

शाकटिका मणिकारा हैरण्या गन्धविक्रये निपुणा:।

गान्धर्वशिल्पलेख्यै: कन्यावर्गे सदा विभवा:।।71।।

(दुप)प्रायोज्यनुपदेशाद्धिरण्यपरिवर्तनाच्च (मित्राच्च)मित्राय।

जायन्ते च मनुष्या नानाव्यवहारभागिन: सततम्।।72।।

वाणिज्यविपणिजीवा(विपण) गोजीवा (भिषज)महिषजीवाश्च।

नानापण्यसमृद्धा: सलिलोद्भवपण्यवृत्तय: ख्याता:।।73।।

धनधान्यमूलवणिज: (कृषिबलाच्चैव)फलमूलकृषीबलाश्चैव।

जायन्ते घटवर्गे दशमस्थानस्थिते कलावृत्ता:।।74।।

स्त्रीसम्पर्कजविभवा जायन्ते (रता:)कर्षणानुनिरताश्च।

नित्योद्युक्ताश्चौरा: पृथिवीपतिसेवका: पापा:।।75।।

देहचिकित्सानिरता लोहकरा जीविनोऽलिसंज्ञर्क्षे।

वर्गे नभस्तलगते धान्यानां चोप जीविनो नित्यम्।।76।।

नृपसचिवदुर्गपालनगोजीवनवाजिकाष्ठशकुनैश्च।

यन्त्रोपस्करगणितैर्जीवन्ति नराश्चिकित्सया धनुष:।।77।।

दशमे कुरङ्गवर्गे जलपण्यधनो भवेन्महाविभव:।

(वामा)खट्वारामारोपणरसायनैर्वर्तते जात:।।78।।

शस्त्रदहनप्रभेदैश्चौर्येण(शौर्येण) च वर्तते खननवृत्त्या।

दशमे घटधरवर्गे भारवहस्कन्धबाहुबलात्।।79।।

शस्त्रात्सलिलाद्योनिप्रपोषणदश्वविक्रयाद्वाऽपि।

वर्गे मीनप्रभवे दशमस्थे जायते वृत्ति:।।80।।

दिवसकराद्यै: खस्थै: शशिहोराभ्यां भवन्त्याढ्या:।

पितृमातृशत्रु हितजनसहजस्त्रीभृत्यवर्गेभ्य:।।81।।

होरागतैर्धनगतैरायगृहस्थैश्च चिन्तयेदर्थम्।

बलसंयुतैर्ग्रहेन्द्रैरनेकधा (पृष्ठम्)दृष्टमाचार्यै:।।82।।

इति कल्याणवर्मविरचितायां सारावल्यां कर्मचिन्ताध्यायस्त्रयस्त्रिश:।।