।।श्रीगणेशाय नमः।।
पृथुयशविरचितम्
होरासारः

स्त्रीजातकोऽध्यायः
फलानि
अथ स्त्रीजातकफलानि

स्त्रीपुरुषयोः समानं योगादि दशाफलं च पूर्वोक्तम्।
यद्यदयोग्यं स्त्रीणां तत्तत्सर्वं वदेत्स्वनार्थेषु।।1।।

वैधव्यं निधनगृहे पतिसौभाग्यं सुखं च जामित्रे।
सौन्दर्यं तु विलग्ने विचिन्तयेत् पुत्रसम्पदं नवमे।।2।।

एषु स्थानेषु युतः सौम्याः शुभदा बलान्विता ज्ञेयाः।
क्रूरास्तु नेष्टफलदा भवनेशविवर्जिताः सदा चिन्त्यम्।।3।।

पुरुषर्क्षे पुरुषांशे लग्नेन्द्वोः पापयुक्तयोर्जाता।
पुरुषाकृतिशीलयुता भर्त्तुरयोग्याऽसमञ्जसा कन्या।।4।।

समराशौ समभागे लग्नेन्द्वोः स्त्रीगुणान्विता कन्या।
सौम्ययुतदृष्टयोर्वा सुभगा साध्वी च विख्याता।।5।।

लग्नेन्द्वोर्यो बलवांस्तस्य त्रिंशांशकैः फलं वाच्यम्।
त्रिंशांशेशो बलवांस्तत्प्रोक्तफलानि सम्यगायान्ति।।6।।

भौमर्क्षे भौमांशे कन्या मृतसूतिका गुणैर्हीना।
मायाविनी बुधांशे मलिनाचाराऽल्पपुत्रा स्यात्।।7।।

पुत्रवती जीवांशे बहुव्ययार्त्ता पतिप्रिया कन्या।
कन्याजननी कन्या शुक्रांशे जारभोगसन्तुष्टा।।8।।

मन्दांशे प्रेष्या स्याद्दुःशीला बहुविध वनिता।
भानोरप्येवं हि त्रिंशांशफलं समादेश्यम्।।9।।

बुधभवने भौमांशे कन्या जारप्रियाल्पपुत्रा स्यात्।
सौम्यांशे तु कुलाढ्या पशुधनभोगान्विता च शुक्रांशे।।10।।

साध्वी पतिप्रिया वा जीवांशे क्षेत्रतुङ्गगे जीवे।
मन्दोशं क्लीबसमा मृतप्रजा वा न भर्तृयुक्ता वा।।11।।

जीवर्क्षे भौमांशे कन्या परिचारिणी सुविख्याता।
जीवांशे तु धनाढ्या सौम्यांशे लोकपूजिता ललना।।12।।

पुत्रवती शुक्रांशे सद्गुणयुक्ता पतिप्रिया साध्वी।
सारांशे तु दरिद्रा कन्याजननी स्वतन्त्रनिरता स्यात्।।13।।

सितभवने भौमांशे दुष्टा कलहप्रिया पतिद्वेष्या।
कुचरित्रा सौम्यांशे काव्यकलागेयवाद्यसन्तुष्टा।।14।।

रूपान्विता गुणाढ्या जीवांशे भर्तृपुत्रसम्पन्ना।
शुक्रांशे भोगवती विदग्धवनिता जनप्रिया ख्याता।।15।।

मन्दांशे च पुनर्भूर्मृतप्रजा रोगसंयुता नित्यम्।
मन्दर्क्षे भौमांशे दासी कुलटा भृतप्रजा कन्या।।16।।

भग्नव्रता च कुलटा मायाविन्यब्जजस्यांशे।
भर्तुः प्रिया च सुभगा जीवांशे लोकविख्याता।।17।।

शुक्रांशे प्रभुशीला वन्ध्या चारित्रलोपिनी वनिता।
मन्दर्क्षे मन्दांशे नीचाचाराऽतिदुर्भगा वनिता।।18।।

वाचाटा रविभवने कुजभागे जारिणी विदेशरता।
पुरुषाकृतिशीलयुता सौम्यांशे कार्यचारिणी कुलटा।।19।।

नृपतिप्रियाऽल्पपुत्रा शुक्रांशे नित्यरोगिणी भवत।
कुशलाकृतिर्दरिद्रा मन्दांशे राजवल्लभा जैवे।।20।।

शशिभवने भौमांशे स्वच्छन्दा कामिनां विनष्टसुता।
अल्पसुता क्षीणायुर्जीवांशे शिल्पिनी बुधस्यांशे।।21।।

बन्ध्या मृतप्रजा वा शुक्रांशे स्त्री च दुष्टरता।
मन्दांशे पतिहीना वनिता कृच्छ्रोपजीविनौ भवति।।22।।

त्रिंशांशकफलमेवं वक्तव्यं दैवविद्वद्भिः।
स्फुटचन्द्ररणियोगात् त्रिंशांशफलं विनिर्द्दिशेत्तस्याः।।23।।

लग्नेन्द्वोर्योवशात! त्रिंशांशफलं विनिर्दिशेदथवा।
शून्येऽस्ते दुर्बले यस्याः पापग्रहनिरीक्षिते।।24।।

सौम्यग्रहदृशा हीने भर्ता कापुरुषो भवेत्।
बुधमन्दयुतोऽस्ते च पतिः क्लीबसमो भवेत्।।25।।

वन्ध्या वा दुर्भगावाऽपि सा च नित्यं प्रवासिनी।
सप्तमे चरराशौ च तदीशे चरभांशके।।26।।

भर्ता प्रवासशीलः स्यात् स्थिरभे स्वगृहे वसेत्।
अस्तभेऽर्केऽभिरिर्दृष्टे भर्त्रोत्सृष्टा भवेत्स्वयम्।।27।।

सप्तमस्थे कुजे तद्वद्बाल्ये सा विधवा भवेत्।
मन्दे सप्तमराशिस्थे तथा शत्रुनिरीक्षिते।।28।।

कन्या वा विधिवा भूत्वा जारानपि च गच्छति।
द्यृने शुभाशुभैर्युक्ते पुनर्भूर्वा भविष्यति।।29।।

अस्तगावारमन्दौ चेत् पापर्क्षे विधवा भवेत्।
बहुभर्त्री भवेत्कन्या सार्के राहौ तु सप्तमे।।30।।

बलहीनेऽस्तगे पापे सौम्यग्रहनिरीक्षिते।
भर्त्रा विसृज्यते नारी नीचारिस्थे च वैरिणी।।31।।

अन्योन्यांशे सितारौ चेञ्जारासक्ता भवेद्वधूः।
तथैव सप्तमे चन्द्रे सा पत्या दुश्चरेत्सह।।32।।

मन्दरर्क्षे विलग्नस्थौ शशिशुक्रौ यदा तदा।
वन्ध्या भवति सा नारी पञ्चमे पापसंयुते।।33।।

अस्तराश्यंशगे भौमे सूर्यतेजस्तांशगेऽपि वा।
सौरेण भूभुवा दृष्टे व्याधियोनिश्च दुर्भगा।।34।।

अस्तर्क्षे शुभदृष्टे च शुभस्यांशे शुभेक्षिते।
चारुश्रोणी प्रिया भर्तृबल्लमा च भवेद् ध्रुवम्।।35।।

अस्तेऽर्के स्वांशके चर्क्षे भर्ता रतिपरो मुदुः।
चन्द्रेऽस्ते स्वांशके चर्क्षे मृदुः परवशः पतिः।।36।।

भौमेऽस्ते स्वांशके क्षेत्रे स्त्रीलोलो निर्धनः पतिः।
सौम्येऽस्ते स्वांशके क्षेत्रे भर्ता विद्वान् सुखी भवेत्।।37।।

जीवेऽस्ते स्वांशके क्षेत्रे गुणवान् निर्जितेन्द्रियः।
शुक्रेऽस्ते स्वांशके क्षेत्रे कान्तः सौभाग्यवान् सुखी।।38।।

मन्देऽस्ते स्वांशके क्षेत्रे वृद्धो मूर्खो भवेत् पतिः।
एवं सप्तमराशिस्वैर्ग्रहः स्त्रीणां फलं वदेत्।।39।।

अस्तराशिफलं प्रोक्तं लग्नराशेः फलं तथा।
फलं भवति दम्पत्योर्बहुयोगफलं बदेत्।।40।।

सौम्यक्षेत्रोदये चन्द्रे शुक्रेण सहिते वधूः।
सुखान्विता पतिद्वेष्या नित्यमस्थिरचारिणी।।41।।

चन्द्रज्ञौ यदि लग्नस्थौ कुलाढ्या ब्रह्मवादिनी।
शुक्राज्ञौ यदि लग्नस्थौ सौभाग्यस्था कुलाढ्यका।।42।।

चान्द्रिचन्द्रसिता लग्ने बहुसौख्यधनैर्युता।
जीवे लग्नेऽतिसम्पन्ना पुत्रवित्तसुखप्रदा।।43।।

क्षेत्रोच्चसंस्थिता लग्ने ह्यशुभास्ते शुभप्रदाः।
क्रूरेऽष्टमे विधवता पापदृष्टे विशेषतः।
निधनेशांशकपतेर्दशायां निश्चयं वदेत्।।44।।

सौम्येऽष्टमस्थे कन्याया भर्तु्।: पूर्वं मृतिर्भवेत्।
पापसौम्ययुते तस्मिन् समकाले तयोर्मृतिः।।45।।

बलाबलं तयोर्ज्ञेयं पुरुषेण विज्ञानता।
भाग्यस्थाने स्थिते सौम्ये सपापेऽस्तेऽष्टमेऽपि वा।।46।।

भर्तृपुत्रसुखैः सार्धं दीर्घकालं च जीवति।
धनुः कर्किझषे लग्ने भर्तृपुत्रादिदुःखदा।।47।।

सिंहालिवृषकन्यासु चन्द्रे तिष्ठति पञ्चमे।
अल्पापत्यां विजानीयात्पुरुषेषु तथा वदेत्।।48।।

लग्नास्ताष्टमभाग्यस्थैः पापैर्दुःखफलान्विता।
साम्यग्रहैरसंमिश्रैः सर्वथा क्लेशमाप्नुयात्।।49।।

क्रूरग्रहे(हैः) सुगते(तैः) बहुप्रसवमादिशेत्।
कन्याप्रदानकालेषु प्रोक्तमार्गविचिन्त्येत्।।50।।

इति श्रीवराहमिहिरसुतश्रीपृथुयशोविरचिते होरासारे स्त्रीजातकाध्यायः पञ्चविंशः।।