आदित्यः सोमो भौमश्च तथा बुधबृहस्पती ।
भार्गवः शनैश्चरश्चैवैते सप्तदिनाधिपाः ।।१।।
नृपाभिषेकं नृपतिप्रयाणं नृपस्य कार्यं नृपदर्शनं च ।
यच्चाग्निकार्यं भुवि किञ्चिदुक्तं तत्सर्वमादित्यदिने प्रशस्तम् ।।२।।
पानं रसानां मधुसोमपानं सौभाग्यकर्माण्यनुलेपनानि ।
क्षेत्रे च बीजानि वपेत् वृक्षान् सोमस्य कुर्याद्दिवसे विधिज्ञः ।।३।।
भेदाभिघातो नगरे पुरे वा सेनापतित्वं च तथैव राज्ये ।
व्यायामशस्त्राभ्यसनं च चौर्यं भूमेःसुतस्याह्नि सदा प्रशस्तम् ।।४।।
दूतप्रवेशो रणकारणार्थं कन्याप्रजार्थं रिपुसन्धिकार्यम् ।
भिन्ने च मन्त्रि प्रतिसन्धनीयं क्षिप्रं प्रशंसन्ति दिने बुधस्य ।।५।।
स्वाध्यायदेवार्चनवेश्मकार्यं संस्कारदीक्षाश्च तथा यतीनाम् ।
वस्त्राणि दारा श्रियभूषणानि कृषिं कुर्याद्देवगुरोर्दिने च ।।६।।
अश्वप्रवाह्यं प्रथमं प्रशस्तं योगप्ररोहो गजरोहणं च ।
कन्याप्रदानं क्रयविक्रयौ च तेषां सदा शुक्रदिने प्रशस्तम् ।।७।।
स्थाप्यं च कर्मक्रतुभिश्च यूपो गृहप्रवेशो गजबन्धनं च ।
ग्रामेऽथ वासो नगरे पुरे वा शनैश्चरे सर्वमिदं प्रशस्तम् ।।८।। ।।८।।