अथ ब्रह्माणं स्वयम्भुवं गुरुं लोकपितामहम् ।
ब्रह्मलोके सुखासीनं काश्यपः परिपृच्छति ।।१।।
किं प्रमाणं मुहूर्त्तानां रात्रौ वा यदि वा दिवा ।
चन्द्रादित्यगतं सर्वं तन्मे प्रब्रूहि पृच्छतः ।।२।।
तस्य शुश्रूषमाणस्य काश्यपस्य महात्मनः ।
प्रोवाच भगवान् सर्वं मुहूर्त्तं ज्ञानमुत्तमम् ।।३।।
द्वादशाक्षिनिमेषस्तु लवो नाम विधीयते ।
लवाः त्रिंशत्कला ज्ञेया कलात्रिंशत्रुटिर्भवेत् ।।४।।
त्रुटीनां तु भवेत्त्रिंशन्मुहूर्त्तस्य प्रयोजनम् ।
द्वादशाङ्गुलमुच्छङ्कुं तस्य छाया प्रमाणतः ।।५।।
नवती षडाङ्गुलाश्चैव प्रतीचीं तां प्रकाशयेत् ।
पुरस्तात्सन्धिवेलायां मुहूर्त्तो रौद्र उच्यते ।।६।।
श्वेतः षष्टिः समाख्यातो मैत्रो वै द्वादशाङ्गुलः ।
षट्सु सारभटो ज्ञेयः सावित्रः पञ्चसु स्मृतः ।।७।।
चतुर्षु तु वैराजस्त्रिषु विश्वावसुस्तथा ।
मध्याह्ने अभिजिन्नाम यस्मिन् छाया प्रतिष्ठिता ।।८।।
प्राचीं वै गामिनीं छायां रौहिणस्त्रिषु वर्तते ।
बलश्चतुर्षु विख्यातो विजयः पञ्चसु स्मृतः ।।९।।
नैर्ऋतस्तु षडङ्गुल्या वारुणो द्वादशाङ्गुलः ।
सौम्यः षष्टिः समाख्यातो भगस्तु परमस्तथा ।।१॰।।
एते मुहूर्त्ता व्याख्याता दश द्वौ च तथा त्रयः ।
अहन्येव तु विज्ञेया रात्रावपि न संशयः ।।११।।
अत ऊर्द्ध्वं तु सर्वेषामानुपूर्व्या शुभाशुभम् ।
सर्वं विस्तरशस्तावत्तन्मे निगदतः श्रृणु ।।१२।। ।।१।।
रौद्रे रौद्राणि कुर्वीत रुद्रकार्याणि नित्यशः ।
यच्च रौद्रं भवेत्किञ्चित् सर्वमेतेन कारयेत् ।।१।।
श्वेते वासश्च स्नानं च ग्रामोद्यानं तथा कृषिः ।
आरम्भाश्चात्र सिध्यन्ति ये चार्थाश्चिन्तिताः क्वचित् ।।२।।
मैत्रे मैत्राणि कुर्वीत मित्रकार्याणि नित्यशः ।
यच्च मैत्रं भवेत्किञ्चित् सर्वमेतेन कारयेत् ।।३।।
अभिचारं तु शत्रूणां कुर्यात्सारभटेन तु ।
आत्मार्थे सुहृदर्थे वा नश्यन्ते तस्य शत्रवः ।।४।।
सावित्रेण मुहूर्त्तेन देवकार्याणि कारयेत् ।
यज्ञान् विवाहानड्वाहंश्चूडोपनयनानि च ।।५।।
वैराजेन मुहूर्त्तेन राजपौरुषमारभेत् ।
मर्माणि परदानानि शस्त्रकर्म च कारयेत् ।।६।।
विश्वावसौ तु सर्वार्थानारम्भांश्चात्र कारयेत् ।
सर्वेषां च द्विजातीनां स्वाध्यायस्तु प्रशस्यते ।।७।।
ब्रह्मक्षत्रियवैश्यानां शूद्राणां चापि नित्यशः ।
सर्वेषामेव वर्णानां योगो मध्यन्दिनेऽभिजित् ।।८।।
अभिजित् सर्वकामाय सर्वकार्यार्थसाधनः ।
अर्थसञ्चयमानानामध्वानं गन्तुमिच्छताम् ।।९।।
रौहिणे वापिता वृक्षा बिल्वगुल्मलतास्तथा ।
अरोगाः पुष्पवन्तश्च फलवन्तश्च नित्यशः ।।१॰।।
बलेन तु बलं राजा स्वयमारुह्य योजयेत् ।
योगः सम्पत्तिकं कार्यं शत्रूंश्च विषमे जयेत् ।।११।। ।।२।।
विजयेन प्रयातस्य विजयो नात्र संशयः ।
मङ्गलान्यत्र कुर्वीत शान्तिः स्वस्त्ययनानि च ।।१।।
नैर्ऋते द्योतयेत्सेनां परराष्ट्रं तु मर्द्दयेत् ।
कर्त्तुः सम्पत्करो ह्येष सर्वशत्रुनिबर्हणः ।।२।।
वारुणेन मुहूर्त्तेन वारुणानि प्रवापयेत् ।
गोधूमान् यवशालींश्च इक्षवश्चोत्पलानि च ।।३।।
सौम्ये सौम्यानि कुर्वीत सोमकार्याणि नित्यशः ।
यच्च सौम्यं भवेत्किञ्चित् सर्वमेतेन कारयेत् ।।४।।
सर्वासामेव नारीणां कन्यानां च विशेषतः ।
सौभाग्यानि प्रयुञ्जीत भगे भीमपराक्रमे ।।५।।
भगेन वरयेत् कन्यां ब्राह्मणीं कुलवर्द्धनीम् ।
भगेन वरिता कन्या नैव सान्यत्र गच्छति ।।६।। ।।३।।